Лента новостей(BASH)

Айыу менән йондоҙ – 2013 йылғы Ҡышҡы халыҡ-ара балалар уйындары эмблемаһы һәм талисманы

Tue, 07 Feb 2012 17:23:09 +0600

VI Ҡышҡы халыҡ-ара балалар уйындары эмблемаһы һәм талисманының иң яҡшы проектына конкурс аҙағына ла етте. Башҡортостандың Йәштәр сәйәсәте һәм спорт министрлығынан хәбәр итеүҙәренсә, комиссия 28 ҡатнашыусының эшен ҡараған. Йәмғеһе 94 заявка ҡабул ителгән.
Стәрлетамаҡ, Күмертау ҡалаларынан, Өфө, Мәсетле, Бөрө, Күгәрсен райондарынан ебәрелгән эштәрҙән тыш, Владивостоктан, Ханты-Манси автономиялы округынан ҡабул ителгән материалдар ҙа бәйгелә ҡатнашҡан.
Ҡыҙыу фекер алышыуҙан һуң, Башҡортостан Республикаһының атҡаҙанған рәссамы Айрат Тереғолов менән «Симай» студияһы етәксеһе Рим Забаров еңеүселәр тип танылған. Улар уртаһында ҡурай сәскәһе төшөрөлгән йондоҙҙо - эмблема итеп, һоро айыуҙы талисман итеп тәҡдим иткән.
Еңеүселәрҙе грамота һәм ҡиммәтле бүләк көтә. Ҡалған ҡатнашыусылар төбәктең Йәштәр сәйәсәте һәм спорт министрлығының рәхмәт хаттарын аласаҡ.
VI Ҡышҡы халыҡ-ара балалар уйындары эмблемаһы һәм талисманы баннерҙарҙы, сувенирҙарҙы һәм баҫма продукцияны биҙәйәсәк.

Независимая газета: «Башҡортостан Президенты – биш иң абруйлы төбәк етәксеһе иҫәбендә»

Tue, 07 Feb 2012 16:52:00 +0600

Башҡортостан Президенты Рөстәм Хәмитов Рәсәйҙең биш иң абруйлы төбәк етәксеһе исемлегенә инде. 2012 йылдың ғинуарына ҡарата тейешле рейтинг «Независимая газета» баҫмаһында донъя күрҙе.
Рөстәм Хәмитов менән бергә иң абруйлы етәкселәр исемлегенә Мәскәү мэры Сергей Собянин, Санкт-Петербург губернаторы Георгий Полтавченко, Чечен Республикаһы башлығы Рамзан Ҡадыров һәм Татарстан Президенты Рөстәм Миңнеханов та инде.
Рейтинг ун баллыҡ система буйынса төҙөлгән. Беренсе урынды биләүсе Сергей Собянин –7,82 балл, Рөстәм Хәмитов 6,33 балл йыйған. Егерме иң көслө етәксе исемелегендә иң аҙаҡ тороусы Ырымбур өлкәһе губернаторы Юрий Бергта – 4,53 балл.
Рейтинг эксперттарҙан һорау алыу һөҙөмтәләренә нигеҙләнә. Сара йәшерен анкета тултырыу ысулы менән үткәрелгән. Һорау алыуҙа 10 эксперт – политологтар, сәйәси технологтар, медиа-эксперттар, журналистар ҡатнашҡан.
Төбәк башлыҡтарының абруйына баһа биреүсе эксперттар исемлегенә түбәндәгеләр ингән: Михаил Виноградов («Петербург сәйәсәте» фонды), Владимир Жарихин (БДБ илдәре институты), Виталий Иванов (Сәйәсәт һәм дәүләт хоҡуғы институты), Артем Коваленко («Эксперт-Урал» журналы), Модест Колеров (REGNUM мәғлүмәт агентлығы), Дмитрий Коняев (Сәйәси һәм иҡтисади коммуникациялар агентлығы), Степан Львов (Бөтә Рәсәй йәмәғәт фекерен өйрәнеү үҙәге), Сергей Михеев (Рәсәйҙең сәйәси конъюнктураһы үҙәге), Дмитрий Орлов (Сәйәси һәм иҡтисади коммуникациялар агентлығы), Валерий Хомяков (Милли стратегия буйынса Совет).

Суд приставтары хеҙмәтендә баһа һәм тәҡдимдәр кенәгәһе булдырыла

Tue, 07 Feb 2012 16:46:52 +0600

Рәсәй федераль суд приставтары хеҙмәтенең Башҡортостан Республикаһы буйынса идаралығының барлыҡ бүлексәләрендә лә суд приставтары эшенә баһа һәм тәҡдимдәр кенәгәһе барлыҡҡа киләсәк. Был граждандарҙың һәм ойошмаларҙың хоҡуҡтарын һәм законлы мәнфәғәттәрен яҡлау һәм етешһеҙлектәрҙе бөтөрөү буйынса оператив ҡарарҙар ҡабул итеү өсөн эшләнә.
Ведомствоның матбуғат хеҙмәтендә хәбәр итеүҙәренсә, баһа һәм тәҡдимдәр кенәгәһендә граждандар суд приставтары-башҡарыусылар эшмәкәрлегенең сифатына бәйле үҙ фекерен, эштәрендәге етешһеҙлектәр тураһында мәғлүмәт ҡалдыра ала.
Бындай кенәгә Рәсәй федераль суд приставтары хеҙмәтенең Башҡортостан Республикаһы буйынса идаралығы аппаратында ла, уның ҡала, район-ара һәм район бүлексәләрендә лә асыласаҡ. Ул граждандарҙы һәм ойошма вәкилдәрен үткәреү пунктында һаҡланасаҡ. Һәр кеше документтарын күрһәтмәйенсә, шулай уҡ сәбәптәрен аңлатмайынса унда яҙыу ҡалдыра ала.
Баһа һәм тәҡдимдәр кенәгәһендә ҡалдырылған һәр яҙма тикшерелергә тейеш, бынан һуң тейешле саралар күреләсәк. Кәрәк булғанда инициаторҙарға яҙма рәүештә яуап ебәреләсәк.

Башҡортостан умартасылары бөтә Рәсәй конкурсын үткәрергә әҙер

Tue, 07 Feb 2012 15:58:00 +0600

Башҡортостан умартасылары республикала бөтә Рәсәй умартасылар конкурсын үткәреү инициативаһы менән сығыш яһаны. Башҡортостан умартасылыҡ һәм апитерапия буйынса ғилми-тикшеренеү үҙәге төбәк һәм Рәсәйҙең аграр ведомстволары адресына тейешле мөрәжәғәт әҙерләй. «Был конкурс мотлаҡ Башҡортостанда үтергә тейеш», — тип иҫәпләй Башҡортостан умартасылыҡ һәм апитерапия буйынса ғилми-тикшеренеү үҙәге директоры Әмир Ишемғолов.
Дөйөм алғанда тармаҡ өсөн үткән йыл уңышлы булған. Статистика мәғлүмәттәренә ярашлы, республика аграрийҙары 5300 килограмдан ашыу тауар балы алған. Шуларҙың 95 проценты — сәскәләрҙән йыйылған бал. Йүкә балы умартасылар продукцияһының 5 процентын тәшкил иткән.
Башҡортостан бренды булған продукция күләмдәренең артыуына дәүләт ярҙамы саралары булышлыҡ иткән. «Былтыр республика умартасылығы тарихында тәүге тапҡыр умартасылар үҫешкә субсидиялар алды», — тип билдәләне Әмир Ишемғолов. — Был федераль һәм республика бюджеттарынан килгән 24 млн һумдан ашыу сумма». Маҡсатлы средстволар ауыл хужалығы тауарҙары етештереүселәргә ярҙамға киткән. Һөҙөмтәлә Башҡортостандың дүрт меңгә яҡын умартасыһы һәр күсте аҫрауға 620-шәр һум аҡса алған.
Быйыл төбәктә умартасылыҡты үҫтереүгә тағы ла ҙурыраҡ сумма – 35 млн һум самаһы йүнәлтеләсәк. Умартасылыҡҡа дәүләт ярҙамы Рәсәй Ауыл хужалығы министрлығы менән Башҡортостан Хөкүмәте араһындағы килешеү нигеҙендә тормошҡа ашырыла. Программа өс йылға иҫәпләнгән. Ул тармаҡ булараҡ умартасылыҡты үҫтереүгә мөмкинлек биреүҙән тыш, фермерҙарға һәм шәхси ярҙамсы хужалыҡ башлыҡтарына ла ярҙам итәсәк.

Хәйбулла районында «Мираҫ. Наследие» муниципаль телеконкурсы старт алды

Tue, 07 Feb 2012 14:53:48 +0600

Хәйбулла районында «Мираҫ. Наследие» муниципаль телевизион конкурсы старт алды.
Илдә иғлан ителгән Рәсәй тарихы йылына арналған конкурс райондың ауыл биләмәләре араһында үтәсәк. Уны ойоштороусылар булып муниципаль район хакимиәте, Аҡъяр телерадиотапшырыуҙар студияһы һәм райондың тарихи-крайҙы өйрәнеү музейы сығыш яһай.
Бәйге 2012 йылдың 1 февраленән 1 октябренә тиклем «Художестволы үҙешмәкәрлек смотры» һәм «Тарихи-крайҙы өйрәнеү йүнәлеше» номинацияларында үтәсәк. Тәүҙә иң яҡшылар һәр ауылда билдәләнәсәк, бынан һуң конкурстың район этабы үтәсәк.
«Художестволы үҙешмәкәрлек смотры» номинацияһында ижади коллективтар жюри хөкөмөнә 1812 йылғы Ватан һуғышына бағышланған концерт номерҙарын тәҡдим итәсәк. Коллективтарҙың сығыштары муниципаль телевидение аша күрһәтеләсәк.
«Тарихи-крайҙы өйрәнеү йүнәлеше» номинацияһында һәр ауыл үҙенең мираҫы – тарихи, архитектура, тәбиғәт, рухи-мәҙәни ҡомартҡыларын, милли мәҙәниәт үҫешенә бәйле йолаларын, һуғыш ваҡиғаларына ҡағылышлы тарих биттәрен тәҡдим итәсәк.
Конкурста ҡатнашыусылар материал тупларға, экспедициялар үткәрергә, тарихи-крайҙы өйрәнеү маршрутын төҙөргә, урындағы йолалар, тарихи урындар буйынса йыйынтыҡ әҙерләргә, фото һәм видео-материалдарҙы ҡулланып, картотекалар эшләргә тейеш. Конкурс эштәрендә тарихи объектты һаҡлап ҡалыу һәм уны нығытыу буйынса эшмәкәрлек сағылырға тейеш.
Бәйгелә еңеүсе ауылдар муниципаль район хакимиәтенең аҡсалата премияһы менән бүләкләнәсәк. Конкурс йомғаҡтары буйынса урындағы телевидение фильм төшөрөргә ниәтләй.