10 декабрь, Шәмбе

17 октябрь 2016 йыл, 15:17

Башҡортостандың халыҡ уйын ҡоралдары милли оркестры ҡоралдар һәм гастролдәр өсөн финанслау аласаҡ

 

ӨФӨ, 2016 йыл, 17 октябрь. /«Башинформ» мәғлүмәт агентлығы, Ләйлә Аралбаева/. Башҡортостандың халыҡ уйын ҡоралдары милли оркестры музыка ҡоралдары һәм Мәскәү, Рәсәй ҡалалары буйлап гастролдәргә сығыу өсөн өҫтәмә аҡса аласаҡ. Был хаҡта филармонияның матбуғат хеҙмәте хәбәр итә. Яңыраҡ коллективтың художество етәксеһе һәм баш дирижеры алмашынды. Хәҙер уның художество етәксеһе — халыҡ-ара һәм бөтә Рәсәй конкурстары лауреаты Линар Дәүләтбаев.

Әлеге ваҡытта оркестр республика ҡалалары буйлап гастролдәрҙә йөрөй. Бөгөн, 17 октябрҙә, коллектив — Учалы ҡалаһында, 20 октябрҙә Яңауылда сығыш яһай. Октябрьский халҡы өсөн милли оркестр «Урал легендалары» исемле программа тәҡдим итә. Концерт 27 октябрҙә музыка колледжында була. Киске сәғәт 6-ла башлана.

«Беҙ башҡорт композиторҙары Урал Иҙелбаев һәм Шәүрә Сәғитованың репертуарын әҙерләнек. «Урал легендалары» программаһы — Рәсәй буйлап ойоштороласаҡ гастролдәрҙең төп темаһы», — тип хәбәр итте Линар Дәүләтбаев.