7 декабрь, Шаршамбы

04 октябрь 2016 йыл, 11:00

Республика делегацияһы «Алтын көҙ» Рәсәй агросәнәғәт күргәҙмәһендә ҡатнаша

фото: Башҡортостан Ауыл хужалығы министрлығы

ӨФӨ, 2016 йыл, 4 октябрь. /«Башинформ» мәғлүмәт агентлығы, Галина Бахшиева/. 5 октябрҙә Мәскәүҙә «Алтын көҙ-2016» XVIII Рәсәй агросәнәғәт күргәҙмәһен асыу тантанаһы була.

Тантанала ил, бер нисә төбәк, Рәсәй Ауыл хужалығы министрлығы етәкселегенең ҡатнашыуы көтөлә. Күргәҙмәлә республиканың Башҡортостан Хөкүмәте Премьер-министры урынбаҫары Ирек Мөхәмәтдинов етәкселегендәге рәсми делегацияһы ла ҡатнаша. Делегация составында Башҡортостандың ауыл хужалығы министры Николай Коваленко, район башлыҡтары, ауыл хужалығы идаралығы начальниктары, фермер хужалыҡтары, агросәнәғәт комплексы предприятиелары етәкселәре һәм етештереү алдынғылары бар.

Республика Ауыл хужалығы министрлығының матбуғат хеҙмәтендә хәбәр итеүҙәренсә, Башҡортостан вәкилдәре «Алтын көҙ-2016» күргәҙмәһенең бөтә төп сараларында ҡатнаша. Улар араһында — «Тотороҡло үҫеш һәм глобаль конкурентлыҡ һәләте факторҙары: кисә, бөгөн, иртәгә» агробизнес форумы, «Рәсәй төбәктәренең ҡеүәте, агросәнәғәт комплексына инвестициялар» инвесторҙар клубы, төрлө түңәрәк өҫтәлдәр, фекер алышыуҙар, шулай уҡ Ауыл хужалығы һәм эшкәртеүсе сәнәғәт хеҙмәткәрҙәре көнөнә арналған тантаналы йыйылыш. Ул 6 октябрҙә Дәүләт Кремль һарайында уҙа.