9 декабрь, Йома

30 сентябрь 2016 йыл, 10:40

Владимир Путин Ҡораллы Көстәргә көҙгө саҡырылыш башланыуын иғлан итте

фото: Олег Яровиков

ӨФӨ, 2016 йыл, 30 сентябрь. /«Башинформ» мәғлүмәт агентлығы, Ғәлиә Нәбиева/. Рәсәйҙә илдең Ҡораллы Көстәренә көҙгө саҡырылыш башлана. Дәүләт башлығы Владимир Путин «2016 йылдың октябрь-декабрендә Рәсәй Федерацияһы граждандарын хәрби хеҙмәткә саҡырыу һәм саҡырыу буйынса хәрби хеҙмәт үтеүселәрҙе хәрби хеҙмәттән бушатыу тураһында»ғы Указға ҡул ҡуйҙы.  

Документҡа ярашлы, 1 октябрҙән 31 декабргә тиклем 18-27 йәшлек егеттәр хәрби хеҙмәткә саҡырылырға тейеш. Быйыл әрмегә 152 мең кеше оҙатыла.

Президент Рәсәй Хөкүмәтенә, ил субъекттарының башҡарма власть органдарына һәм саҡырылыш комиссияларына Рәсәй граждандарын хәрби хеҙмәткә саҡырыуға бәйле сараларҙы үтәүҙе тәьмин итергә ҡушты.