9 декабрь, Йома

23 август 2016 йыл, 11:06

Өфөлә мәктәптәр һәм баҡсалар балаларҙы ҡабул итеүгә 99 процентҡа әҙер

фото: Олег Яровиков

ӨФӨ, 2016 йыл, 23 август. /«Башинформ» мәғлүмәт агентлығы, Ксения Калинина/. Өфөлә мәктәптәр һәм баҡсалар  балаларҙы ҡабул итеүгә 99 процентҡа әҙер. 25 авгусҡа белем биреү учреждениеларында ремонт эштәре 100 процентҡа тамамланасаҡ. 23 августа ҡала хакимиәтендә үткән оператив кәңәшмәлә Мәғариф идаралығы етәксеһе Елена Хаффазова ошо хаҡта белдерҙе.

Уның әйтеүенсә, 80 бинаны — 36 мәктәпте, 40 балалар баҡсаһын һәм дүрт өҫтәмә белем биреү учреждениеһын капиталь ремонтлау өсөн ҡала бюджетынан 100 миллион һум аҡса йүнәлтелде. Бынан тыш, юл-транспорт хәүефһеҙлегенә ҙур иғтибар бүленде. Әҙерлек осоронда мәктәптәр янында 300 юл билдәһе, 10 светофор ҡуйылған һәм 16 мең квадрат метр юл тамғалары һыҙылған. Быйыл мәктәптәр һәм балалар баҡсалары өсөн ике тапҡырға тиерлек күберәк дәреслектәр һәм уйынсыҡтар һатып алынған.

2016 йылда 12,2 мең уҡыусы беренсе класҡа бара, тип билдәләне Елена Хаффазова. Ҡалала бөтәһе 107,1 мең уҡыусы белем  ала.