8 декабрь, Кесе йома

19 август 2016 йыл, 15:53

2017 йылғы Берҙәм дәүләт имтиханы расписаниеһы билдәле булды

фото: Рособрнадзор сайты

ӨФӨ, 2016 йыл, 19 август. /«Башинформ» мәғлүмәт агентлығы, Эльмира Сабирова/. 2017 йылғы Берҙәм дәүләт имтиханы расписаниеһы билдәле булды. Төп этап 26 майҙан 30 июнгә тиклем уҙа. 14 марттан 7 апрелгә тиклем имтиханды ваҡытынан алда тапшырырға мөмкин. Расписаниеның проектын Мәғариф һәм фән өлкәһендә күҙәтеү буйынса федераль хеҙмәт әҙерләгән.

Имтихандарҙы ваҡытынан алда һәм төп этапта тапшырырға була. Үткән йылдағы кеүек үк «июль тулҡыны» ҡаралмаған.

Ғәҙәттәгесә, йәмғиәтте өйрәнеү фәне буйынса Берҙәм дәүләт имтиханы өсөн айырым көн билдәләнгән.

Бынан тыш, айырым уҡыу предметтары буйынса Берҙәм дәүләт имтиханын һәм дәүләт сығарылыш имтиханын үткәреү өсөн резерв ваҡыт менән бер рәттән бөтә фәндәр буйынса имтихан үткәреү өсөн өҫтәмә резерв көн ҡаралған. Ул теге йәки был сәбәп буйынса төп йә иһә резерв көндә ҡатнаша алмаған уҡыусылар өсөн кәрәк.

31 авгусҡа тиклем ведомство repina@obrnadzor.gov.ru электрон адресына расписаниеның проектына тәҡдимдәр ҡабул итә.