11 декабрь, Йәкшәмбе

29 июнь 2016 йыл, 16:12

Баш ҡалала етештереүселәр һәм чиновниктар башҡорт һөтөнөң намыҫын яҡланы

фото: Олег Яровиков

ӨФӨ, 2016 йыл, 29 июнь. /«Башинформ» мәғлүмәт агентлығы, Ольга Мортазина/. «Россельхознадзор»ҙың һөттә эзбиз, аҡбур, гипс һәм һабын рәүешендәге өҫтәмәләр табылыуы тураһында белдереүенән һуң Өфөлә матбуғат конференцияһы ойошторолдо. 20 июндә яңғыраған мәғлүмәт илдә һөт етештереүгә ҡағылды һәм ҙур резонанс тыуҙырҙы.

«Россельхознадзор»ҙың республика идаралығы етәксеһе Юрий Петров аңлатыуынса, ҡайһы бер матдәләрҙең һөт сәнәғәтендә файҙаланылған эмульгаторҙар ҡулланыу һөҙөмтәһендә барлыҡҡа килеүе ихтимал. Был әҙер ризыҡҡа сит матдәләрҙе ҡушыу тигәнде аңлатмай. «Был бер кемгә лә кәрәкмәй. Етештереүҙең бөтә этаптарында ла тикшереүҙәр уҙғарыла», — тип белдерҙеләр Башҡортостан Һөтсөлөк союзы вәкилдәре.

«Россельхознадзор»ҙың төбәк идаралығы мәғлүмәттәре буйынса, йыл башынан 279 һөт продукцияһы өлгөһө алынған һәм 40 фальсификациялау осрағы асыҡланған. Шуларҙың 25 осрағы урында етештерелгән тауарҙарға ҡараған. «Һөт майын үҫемлек майы менән алмаштырыу тыйылмай. Әммә был осраҡта тауар һөт түгел, ә һөт продукты тип аталырға тейеш. Быны этикеткала яҙырға кәрәк. Әгәр етештереүсе составы үҙгәртелгән продукцияны тәбиғи ризыҡ тип атай икән, бына ошо була инде фальсификациялау», — тине Юрий Петров.