3 декабрь, Шәмбе

09 июнь 2016 йыл, 16:42

Мәғариф министрлығында — яңы министр урынбаҫары

фото: Башҡортостан Мәғариф министрлығы сайтынан

ӨФӨ, 2016 йыл, 9 июнь. /«Башинформ» мәғлүмәт агентлығы, Эльмира Сабирова/. Башҡортостан Хөкүмәте ҡарары менән Филүс Минәзев республиканың мәғариф министры урынбаҫары итеп тәғәйенләнде. Быға тиклем ул Башҡортостан Хөкүмәте Аппаратында баш белгес, кәңәшсе вазифаһын биләгән.

Филүс Хәмитйән улы Минәзев 1972 йылда тыуған. Юғары белемле. 1994 йылда — Башҡорт дәүләт педагогия институтын (физика һәм математика белгеслеге), 2007 йылда Башҡортостан Башлығы ҡарамағындағы Башҡортостан дәүләт хеҙмәте һәм идара итеү академияһын тамамлаған.

Хеҙмәт эшмәкәрлеген 1994 йылда Илеш районы Үрге Йәркәй урта мәктәбендә математика һәм информатика уҡытыусыһы булараҡ башлаған. 1995 йылда — Илеш районы халыҡ депутаттары Советында баш белгес, 1996 йылда — Илеш урта мәктәбе директоры, 2001 йылда — Ҡәҙер ауыл хакимиәте башлығы, 2006 йылда — Үрге Йәркәй ауылының 4-се урта дөйөм белем биреү мәктәбе директоры. 2008 йылдан алып әлегә тиклем Башҡортостан Хөкүмәте Аппаратында эшләгән.