8 декабрь, Кесе йома

18 май 2016 йыл, 15:30

Быйыл йәй Өфөлә 11 пляж эшләйәсәк

 

ӨФӨ, 2016 йыл, 18 май. /«Башинформ» мәғлүмәт агентлығы, Гөлфиә Акулова/. Баш ҡала һыу инеү миҙгеленә әҙерләнә. Өфө хакимиәте сайтында хәбәр ителеүенсә, быйыл йәй ҡала биләмәһендә 11 ял итеү урыны билдәләнгән.

Киров районында йәшәүселәр Ағиҙел йылғаһы буйында урынлашҡан «Бельский» һәм «Ҡояшлы» пляждарында ял итә ала. Октябрь районы халҡы өсөн Ҡариҙел буйында «Сипайлово Сочиһы» һәм «Ҡояш яры», Калинин районында «Шарлауыҡ» һәм «Ҡомло» пляждары, Йылы күл янында — «Ожмах яры» һәм «Гольфстрим», Дим районында «Матур» һәм «Карьер» ял итеү урындары асыла.

Өфө хакимиәте 25 майға тиклем халыҡ күпләп ял иткән урындарҙа талпанға ҡаршы эшкәртеү үткәрергә, тыйыусы билдәләр һәм яҙыуҙар ҡуйырға ҡушты. Ҡотҡарыусылар 31 авгусҡаса дежур итәсәк. Пляждар 1 июнгә әҙер булырға тейеш.