10 декабрь, Шәмбе

17 май 2016 йыл, 12:09

Өфөлә вертолетты ҡапыл ултыртыу факты буйынса енәйәт эше ҡуҙғатылды

фото: Олег Яровиков

ӨФӨ, 2016 йыл, 17 май. /«Башинформ» мәғлүмәт агентлығы, Артур Басиров/. Өфөлә вертолетты ҡапыл ултыртыу факты буйынса енәйәт эше ҡуҙғатылды. Был хаҡта Рәсәйҙең Тәфтиш комитеты транспортында Волга буйы тикшереү идаралығы хәбәр итә.

Тикшереү фаразы буйынса, 13 апрелдә көндөҙгө сәғәт 1-се яртыла «Лайт Эйр» авиакомпанияһына ҡараған «Robinson R 66» маркалы вертолет Өфөнөң Октябрь районы Нуғай ауылы эргәһендәге баҫыуға төшә. Ваҡиға һауа судноһында уҡыу-күнекмә осошон яһағанда теркәлә. Яҡынса иҫәпләүҙәр буйынса, зыян күләме 44 миллион һумдан ашыу тәшкил итә. Пилот һәм пассажир зыян күрмәгән.

Әле тикшереү эштәре алып барыла, шаһиттарҙан һорау алына, экспертиза үткәрелә. Ваҡиғаға вертолеттың техник етешһеҙлектәре һәм пилоттың хатаһы сәбәпсе булыуы ихтимал.