8 декабрь, Кесе йома

16 май 2016 йыл, 14:14

Башҡортостандан 17 йәшлек һылыуҡай «Рәсәй королеваһы-2016» титулына дәғүә итә

фото: «Мисс Башкортостан» модель агентлығы

ӨФӨ, 2016 йыл, 16 май. /«Башинформ» мәғлүмәт агентлығы, Гөлфиә Акулова/. «Мисс Башкортостан-2016» республика матурлыҡ конкурсы финалсыһы, 17 йәшлек Нефтекама ҡыҙы Рәминә Хәмиҙуллина ошо көндәрҙә Мәскәүҙә барған «Рәсәй королеваһы-2016» бөтә Рәсәй гүзәллек бәйгеһенең финалына сыҡты.

«Мисс Башкортостан» модель агентлығында хәбәр итеүҙәренсә, республика вәкиле ошо конкурста тәүге урындарҙы яулауға лайыҡ. Сибәр, спорт менән шөғөлләнгән һәм маҡсатҡа ынтылыусан ҡыҙ «Мисс Нефтекамск-2014» титулына эйә, башҡа гүзәллек конкурстарында ҡатнашыу тәжрибәһе лә бар. Рәминә бокс менән мауыға, интерьер дизайнеры һөнәренә уҡый.

Конкурстың финалы 21 майҙа уҙа. Илле һылыуҡайҙың береһе «Рәсәй королеваһы» титулына эйә буласаҡ. Быйыл бәйге «Рәсәйҙә Һиндостан мәҙәниәте» фестивале барышында Һиндостан мәҙәниәте үҙәге ярҙамында ойошторола, махсус рәүештә «Һиндостан принцессаһы» номинацияһы булдырылған. Еңеүсегә төп бүләк — Һиндостанға сәйәхәт.