3 декабрь, Шәмбе

26 апрель 2016 йыл, 17:54

Бөгөндән Өфөлә һыу кире ҡайта башлаясаҡ — ҡала хакимиәтенең Граждандарҙы яҡлау идаралығы

фото: Олег Яровиков

ӨФӨ, 2016 йыл, 26 апрель. /«Башинформ» мәғлүмәт агентлығы, Артур Басиров/. Бөгөндән Өфөлә һыу кире ҡайта башлаясаҡ. Был хаҡта шишәмбе, 26 апрелдә, «Башинформ» агентлығында үткән матбуғат конференцияһында баш ҡала хакимиәтенең Граждандарҙы яҡлау идаралығы етәксеһе Рәсим Абдуллин хәбәр итте.

«Өфө биләмәһендә әле 50 йорт — һыу аҫтында. Ағиҙел, Ҡариҙел, Дим йылғалары ташыуҙан туҡтаны тиерлек. Бөгөндән һыу кире ҡайта башлаясаҡ, тип ышанайыҡ», — тине Рәсим Абдуллин.

Республиканың Ғәҙәттән тыш хәлдәр буйынса дәүләт комитеты рәйесе Фәрит Ғүмәров һүҙҙәренсә, хәҙер ташҡын эҙемтәләрен бөтөрөү ташҡынға ҡаршы сараларҙың төп фазаһы буласаҡ.

«Һыу тиҙ генә килә, әммә кәмемәй. Ғәҙәттән тыш хәлдәр булмаһын, ауырыуҙар таралмаһын өсөн бөтә сараларҙы күрергә кәрәк. Һыу баҫҡан урамдарҙың, райондарҙың һәм йорттарҙың йәшәү тәьминәте системаһын тейешле хәлгә килтерергә тейешбеҙ», — тип билдәләне Фәрит Ғүмәров.

темалар: ташҡын