5 декабрь, Дүшәмбе

20 апрель 2016 йыл, 18:14

Төбәктә йәшәүселәр ипотека өсөн айына уртаса 18 мең һум түләй

фото: Олег Яровиков

ӨФӨ, 2016 йыл, 20 апрель. /«Башинформ» мәғлүмәт агентлығы, Олеся Серёгина/. Башҡортостанда йәшәүселәр ипотека өсөн уртаса 18,097 мең һум түләй. Ошо күрһәткес буйынса республика «СеверИнформ» мәғлүмәт-аналитика агентлығы төҙөгән рейтингта 50-се урынды биләй. Эксперттар Рәсәйҙең Үҙәк банкы һәм Росстат мәғлүмәттәренә нигеҙләнеп тикшереү үткәргән.

Республикала ипотека торлаҡ кредитының уртаса күләме — 1,439 миллион һум, кредит буйынса ставка 12,59 процент тәшкил итә. Төбәктә йәшәүселәрҙең уртаса айлыҡ килеме 24,9 мең һумға баһалана.

Рейтингка ярашлы, ипотека өсөн иң күп түләүселәр — мәскәүҙәр. Илдең баш ҡалаһында ипотеканың уртаса суммаһы — 3,5 миллион һум, айлыҡ түләү 42 мең самаһы тәшкил итә. Ульяновск, Киров һәм Кострома өлкәләрендә 15 меңдән аҙыраҡ түләйҙәр.

Рәсәй буйынса ипотеканың уртаса күләме — 1,741 миллион һум, кредит ставкаһы — 12,22 процент һәм айлыҡ түләү 21,061 мең һум тәшкил итә.