7 декабрь, Шаршамбы

19 апрель 2016 йыл, 11:02

Швейцарияла һабантуй һәм бишбармаҡ-party уҙғарыла

 

ӨФӨ, 2016 йыл, 19 апрель. /«Башинформ» мәғлүмәт агентлығы, Ләйлә Аралбаева/. 5 июндә Женевала (Швейцария) татар-башҡорт фестиваль-һабантуйы уҙғарыла. Халыҡ байрамы иртәнге сәғәт 9-ҙан киске 6-ға тиклем «Silk Road» рестораны паркында үтә. Ойоштороусыһы — «Юлдаш» Швейцария татарҙары һәм башҡорттары ассоциацияһы.

Халыҡ байрамына килеүселәрҙе ҙур концерт программаһы, милли сувенирҙар һәм ҡулдан эшләнгән әйберҙәр һатыу күргәҙмәһе, традицион аш-һыу һәм өлкәндәр, балалар өсөн спорт ярыштары көтә. Инеү бушлай.

«Женевала һабантуйға әҙерлек тулы кимәлдә бара. Бай концерт һәм спорт программаһы, ритайым һәм башҡа сюрприздар планлаштырыла. Ошо сараға ҡушылыусылар өсөн 4 июндә Женева буйлап экскурсия һәм башҡорт көйҙәренә бишбармаҡ-party ойошторам!», — тип хәбәр итте социаль селтәрҙә Швейцарияла йәшәүсе яҡташыбыҙ Айһылыу Йәнтүрина-Дарлес.