3 декабрь, Шәмбе

17 март 2016 йыл, 15:25

Башҡортостандың ике районында — юғары әҙерлек, береһендә ғәҙәттән тыш хәл режимы индерелгән

 

ӨФӨ, 2016 йыл, 17 март. /«Башинформ» мәғлүмәт агентлығы, Артур Басиров/. Баймаҡ һәм Йылайыр райондарында — юғары әҙерлек, Хәйбуллала ғәҙәттән тыш хәл режимы индерелгән. Рәсәй Ғәҙәттән тыш хәлдәр министрлығының баш идаралығында ведомство-ара оператив штаб булдырылған.

Ведомствонан хәбәр итеүҙәренсә, эвакуацияланған халыҡты тәү сиратта тәьмин итеүҙе ойоштороу өсөн алты ваҡытлыса урынлаштырыу пункты әҙерләнгән. Унда 91 кеше урынлаштырылған, шуларҙың икәүһе — балалар. 19 стационар йылыныу пункты эшләй. Хәйбулла районында ун кешегә иҫәпләнгән мобиль йылыныу пункты булдырылған, ҡайнар аш бирелә. Рәсәй Ғәҙәттән тыш хәлдәр министрлығы эҙләү-ҡотҡарыу отряды Өфө филиалының махсуслаштырылған «КамАЗ» автомобилендә 20 кеше һыйҙырышлы мобиль йылыныу пункты эшләй.