10 декабрь, Шәмбе

11 март 2016 йыл, 12:18

Республика селекция ҡаҙаныштарын һынау һәм һаҡлау буйынса Рәсәйҙең дәүләт комиссияһы менән килешеү төҙөнө

фото: Олег Яровиков

ӨФӨ, 2016 йыл, 11 март. /«Башинформ» мәғлүмәт агентлығы, Галина Бахшиева/. Башҡортостандың Ауыл хужалығы министрлығы селекция ҡаҙаныштарын һынау һәм һаҡлау буйынса Рәсәйҙең дәүләт комиссияһы менән хеҙмәттәшлек тураһында килешеү төҙөнө.

Документ берлектә ғилми-тикшеренеү, тәжрибә-производство һәм эксперименталь эштәр үткәреүҙе, ауыл хужалығы культураларының алдынғы селекция ҡаҙаныштарын өйрәнеү, һынау һәм производствоға индереүҙе, кадрҙар әҙерләүҙе, уларҙың квалификацияһын күтәреүҙе һәм башҡа сараларҙы күҙ уңында тота.

Рәсәй Селекционерҙар һәм орлоҡсолоҡ белгестәренең милли союзы йыйылышында Башҡортостандың ауыл хужалығы министры Николай Коваленко әйтеүенсә, бөгөн орлоҡсолоҡ селекцияһы республика агросәнәғәт комплексын үҫтереү стратегияһының төп йүнәлеше булып тора.

Әлеге ваҡытта Башҡортостан ауыл хужалығы ғилми-тикшеренеү институты һәм Башҡорт дәүләт аграр университеты ауыл хужалығы культуралары селекцияһы һәм орлоҡсолоҡ системаһын тәҡдим иткән. Төбәк биләмәһендә сорттарҙы һынау менән «Госсорткомиссия» федераль дәүләт бюджет учреждениеһының Башҡортостан филиалы шөғөлләнә.

Николай Коваленко һүҙҙәренсә, министрлыҡ беренсел орлоҡсолоҡ селекцияһы программаһын әҙерләгән дә инде, уны 2016 йылда яҡлау күҙаллана.