6 декабрь, Шишәмбе

16 февраль 2016 йыл, 14:40

Республикала финанс өлкәһендәге мәғлүмәт хәүефһеҙлеге тикшерелә

 

ӨФӨ, 2016 йыл, 16 февраль. /«Башинформ» мәғлүмәт агентлығы, Олеся Серёгина/. Бөгөн, 16 февралдә, Әбйәлил районында «Банктарҙың мәғлүмәт хәүефһеҙлеге» тип аталған VII Урал форумының пленар ултырышы бара. Республика Башлығы Рөстәм Хәмитовтың форумда ҡатнашыусыларға ебәргән сәләмләү хатын Башҡортостан Хөкүмәте Премьер-министры Рөстәм Мәрҙәнов уҡып ишеттерҙе.

Көн тәртибенә финанс өлкәһендә кибер енәйәттәргә юл ҡуймау, инновацион банк технологияларының һәм финанс ойошмаларының мәғлүмәт хәүефһеҙлеген тәьмин итеү мәсьәләләре индерелгән.

Урал форумы — финанс мәғлүмәт хәүефһеҙлеге өлкәһендә йылдың төп ваҡиғаһы. Сараға финанс ойошмалары, күҙәтеү һәм көйләү органдарының 350-нән ашыу вәкиле, эске контроль хеҙмәте белгестәре, мәғлүмәт хәүефһеҙлеге, финанс өлкәһендә мәғлүмәт хәүефһеҙлеген тәьмин итеү буйынса продукттар, хеҙмәттәр тәҡдим итеүсе Рәсәй һәм сит ил компаниялары аудиторҙары йыйылды. Форумды Рәсәй банкы ярҙамында Рәсәй банктары ассоциацияһы ойоштора.

Форум барышында — 15 февралдән 20-нә тиклем — банктарҙың хәүефһеҙлек хеҙмәте етәкселәре Рәсәй банкы, Рәсәй Федераль хәүефһеҙлек хеҙмәте, Техник һәм экспорт контроле буйынса федераль хеҙмәт, Эске эштәр министрлығы һәм Роскомнадзор вәкилдәре менән аралаша. Улар талаптар, контроль-күҙәтеү эшмәкәрлеге һөҙөмтәләре, ҡануниәт яңылыҡтары хаҡында мәғлүмәт бирә.