8 декабрь, Кесе йома

05 февраль 2016 йыл, 18:01

«Ҡара йөҙҙәр» спектакле дүрт номинацияла «Алтын битлек» премияһына дәғүә итә

 

ӨФӨ, 2016 йыл, 5 февраль. /«Башинформ» мәғлүмәт агентлығы, Ләйлә Аралбаева/. Мәжит Ғафури исемендәге Башҡорт драма театрының «Ҡара йөҙҙәр» спектакле Рәсәйҙең «Алтын битлек» театр премияһы конкурсында ҡатнаша. Театрҙың матбуғат хеҙмәтендә хәбәр итеүҙәренсә, коллектив 24 мартта киске сәғәт 7-лә Яуза буйындағы һарайҙа тамашасылар яратып өлгөргән спектаклде сәхнәләштерә.

Спектакль «Иң яҡшы режиссер эше» (Айрат Абушахманов), «Иң яҡшы рәссам эше» (Альберт Нестеров), «Иң яҡшы костюмдар оҫтаһы эше» һәм «Иң яҡшы ҡатын-ҡыҙ роле» номинацияларына дәғүә итә. Билет хаҡы 350 һумдан башлана. Билеттарҙы фестивалдең сайтында бронләү йәки Чехов метроһы (Пушкин, Тверь), Большая Дмитровка урамы, 32, 1-се йорт адресы буйынса урынлашҡан кассала һатып алыу мөмкинлеге бар.

«Башҡорт классигы Мәжит Ғафуриҙың повесы уҙған быуаттың 30-сы йылдарында революцияға тиклемге тормоштоң хөрәфәттәре тураһында хикәйә булараҡ яҙылған. Әҫәрҙә боронғо традициялар ике ғашиҡ йәндең — Ғәлимә менән Закирҙың бәхетен һәм ғүмерен ҡыя. Заманса театр һәм йәш режиссер Айрат Абушахманов беҙҙең көндәрҙә лә бик актуаль булған диндәге, ырыуҙағы, көнкүрештәге сабырһыҙлыҡ тарихын уйнай», — тип билдәләй театр тәнҡитсеһе Владимир Спешков.