4 декабрь, Йәкшәмбе

26 ноябрь 2015 йыл, 13:14

Өфөнөң Октябрь проспектында яңы сквер барлыҡҡа киләсәк

 

ӨФӨ, 2015 йыл, 26 ноябрь. /«Башинформ» мәғлүмәт агентлығы, Ольга Мортазина/. Киләһе йылда Өфөлә «Китап» нәшриәте һәм 10-сы һөнәрселек лицейы араһындағы ҙур булмаған скверҙы ремонтларға ниәтләйҙәр. Баш ҡаланың Коммуналь хужалыҡ һәм төҙөкләндереү идаралығының дәүләт һатып алыуҙары сайтында урынлаштырылған заявкаһында билдәләнгәнсә, эштәр 2016 йылдың 15 апреленән 30 октябргә тиклем дауам итәсәк.

Проект документацияһында шәхестең исеме яҙылмаған пьедестал һәм бюст ҡуйыу ҡаралған. Әммә быға тиклем идаралыҡ ошо урында башҡорт яҙыусыһы Зәйнәб Биишеваға һәйкәл асырға ниәтләүҙәре хаҡында хәбәр иткәйне.

Проект яңы асфальт, брусчатка, рулонлы газон түшәүҙе, таштарҙан һәм сәскәләрҙән клумбалар эшләүҙе, ҡайындар, миләштәр һәм гөлйемеш ҡыуаҡтарын ултыртыуҙы, фонарҙар ҡуйыуҙы күҙ уңында тота. Ошо эштәр өсөн бюджет 3,5 миллион һум аҡса бүлә.