4 декабрь, Йәкшәмбе

14 октябрь 2015 йыл, 17:43

Өфөлә уҡыусыларҙың көҙгө каникулына сағыу әкиәт китаптары донъя күрҙе

 

ӨФӨ, 2015 йыл, 14 октябрь. /«Башинформ» мәғлүмәт агентлығы, Ләйлә Аралбаева/. Көҙгө каникулдар алдынан «Китап» нәшриәте кескәйҙәр өсөн сағыу әкиәт китаптарын баҫтырып сығарҙы. «Ҡамыр батыр» башҡорт халыҡ әкиәте донъя күрҙе. Китаптың төҙөүсеһе — Айгөл Хәкимова, рус теленә Наза Әхмәҙиева тәржемә иткән.

Надежда Шмидтың «Бал ҡорто Наҙгөл һәм уның дуҫтары» исемле йыйынтығы мәктәпкәсә һәм кесе йәштәге мәктәп балалары өсөн тәғәйенләнгән. Бәләкәй генә ғәмһеҙ бал ҡорто хаҡында әкиәт кескәйҙәрҙе бөжәктәр һәм шифалы үҫемлектәр донъяһы менән таныштырыр, балдың файҙаһы тураһында бәйән итер. Проекттың авторы — Башҡортостан умартасылыҡ һәм апитерапия буйынса ғилми-тикшеренеү үҙәгенең генераль директоры Әмир Ишемғолов. Йыйынтыҡты Айгөл Бикташева башҡортсаға тәржемәләгән.

Ике китап та башҡорт һәм рус телдәрендә баҫылған. Һәр бит рәссамдар Азат Мөхтәруллин һәм Ирина Әхмәҙуллинаның сағыу һүрәттәре менән биҙәлгән. Яңы китаптарҙы «Китап» нәшриәтенең фирма магазиндарында һатып алырға мөмкин, телефон (347) 246-09-55.

темалар: китап сығарыу