6 декабрь, Шишәмбе

18 сентябрь 2015 йыл, 18:10

Баш ҡалала «Ватандаш» журналы хеҙмәткәрҙәре «Әҙәби троллейбус» пассажирҙары менән аралашты

фото: «Ватандаш» журналы редакцияһы

ӨФӨ, 2015 йыл, 18 сентябрь. /«Башинформ» мәғлүмәт агентлығы, Әлим Фәйезов/. «Әҙәби троллейбус» акцияһы өфөләрҙең күңеленә хуш килде. Республика киң мәғлүмәт сараларының күбеһе ошо акцияла ҡатнашты. Кисә эстафетаны «Ватандаш» журналы редакцияһы ҡабул итте.

2-се маршрут буйынса йөрөгән троллейбус үҙенсәлекле шиғри майҙансыҡҡа әүерелде. Пассажирҙар ижади мөхиткә сумды, «Ватандаш»тың яңы һанын уҡыны, баш мөхәррир — шағир Азамат Юлдашбаев һәм ошо баҫманың хеҙмәткәрҙәре менән аралашты, Әнисә Таһированың нескә лирикаһын тыңланы. Билдәле сатирик Марсель Сәлимов бер үк ваҡытта йылмайырға ла, уйланырға ла мәжбүр итте. «Әҙәби троллейбус»тың ҡайһы бер пассажирҙары, ижади акция менән әҫәрләнеп, сығыштарға ҡушылды. Туҡталыштарына барып еткәс, уларҙың күптәре ошо күңелле минуттар бүләк иткәндәре өсөн рәхмәт белдерҙе, тип хәбәр иттеләр «Ватандаш» редакцияһында.