8 декабрь, Кесе йома

30 июль 2015 йыл, 14:30

Өфө Рәсәй мөфтиәте резиденцияһы урынлашасаҡ урын өсөн тауыш биреүҙә тәүге урында килә

фото: Андрей Старостин

ӨФӨ, 2015 йыл, 30 июль. /«Башинформ» мәғлүмәт агентлығы, Арина Рәхимҡолова/. Рәсәй мосолмандарының Үҙәк диниә назараты мөфтиәт резиденцияһы урынлашасаҡ урын өсөн тауыш биреү уҙғара. Әлеге мәлдә Өфө исемлектә беренсе урынды биләй. Икенсе урында — Ҡазан, өсөнсөлә — Мәскәү һәм Махачкала. Грозный ҡалаһы иң аҙ тауыш йыйған. Конкурс «Бәйләнештә» социаль селтәрендә Рәсәй мосолмандары Үҙәк диниә назаратының рәсми битендә уҙа.

«Һуңғы ваҡытта Рәсәйҙең ҡайһы ҡалаһы йәки төбәге илебеҙ мосолмандарының административ үҙәге тип иҫәпләнә ала тигән мәсьәлә йыш күтәрелә. Беҙҙең өммәнең рухи үҙәгенә килгәндә, бер ниндәй һорауҙар ҙа юҡ. Рәсәйҙәге исламдың ике бишеге — Болғарҙа һәм Дербентта. Ә бына Рәсәй мөфтиәтенең резиденцияһы ҡайҙа булырға тейешлеге тураһында мәсьәлә форумдарҙа, киң мәғлүмәт сараларында һәм мосолман ойошмаларының сайттарында әүҙем тикшерелә», — тип аңлаттылар ойоштороусылар тауыш биреүҙең маҡсатын.

5 авгусҡаса теләгән һәр кем үҙ фекерен белдерә ала.