6 декабрь, Шишәмбе

23 июль 2015 йыл, 15:25

Баш ҡала уҡыусылары халыҡ-ара алмашыу буйынса Төркиәгә барасаҡ

 

ӨФӨ, 2015 йыл, 23 июль. /«Башинформ» мәғлүмәт агентлығы, Эльмира Сабирова/. Өфө уҡыусылары «MULTI» халыҡ-ара алмашыу программаһы буйынса Төркиәгә барасаҡ. 26 июлдә 14 үҫмер Мерсин ҡалаһына юллана, унда улар ике аҙна буйына төрөк ғаиләләрендә йәшәйәсәк. Уларҙы ҡыҙыҡлы, бай программа көтә: уҡыусылар Төркиәнең мәҙәниәте, сәнғәте, йолалары менән танышасаҡ, ҡаланың иҫтәлекле урындары буйлап экскурсияға сығасаҡ һәм диңгеҙ буйында ял итәсәк. Был хаҡта ошо сәйәхәтте ойошторған Өфө хакимиәтенең йәштәр сәйәсәте комитетынан хәбәр иттеләр.

Баш ҡалала «MULTI» халыҡ-ара алмашыу программаһы 2009 йылдан ғәмәлгә ашырыла, ул Төркиәне, Германияны, Японияны, Ҡытайҙы берләштерә. Унда 18 йәшкә тиклемге һәләтле, инглиз телен яҡшы белгән  егет-ҡыҙҙҙар ҡатнаша ала.

Программаның маҡсаты — халыҡ-ара йәштәр сәйәсәте өлкәһендә хеҙмәттәшлекте киңәйтеү, йәштәр ойошмалары һәм берләшмәләре араһында тәжрибә уртаҡлашыу.