3 декабрь, Шәмбе

16 июнь 2015 йыл, 11:42

Рәсәй банкы төп ставканы 11,5 процентҡа тиклем кәметте

 

ӨФӨ, 2015 йыл, 16 июнь. /«Башинформ» мәғлүмәт агентлығы, Әлим Фәйезов/. Рәсәй банкы төп ставканы 12,5-тән 11,5 процентҡа тиклем кәметеүе хаҡында иғлан итте. Һуңғы биш айҙа ставка дүртенсе тапҡыр кәметелә.

Директорҙар советы ултырышы йомғаҡтары буйынса 15 июндә Рәсәй банкы төп ставканы 11,5 процентҡа тиклем кәметеүе хаҡында белдерҙе. «Рәсәй банкының директорҙар советы иҡтисадтың «һыуыныу» хәүефе һаҡланғанда инфляция хәүефенең артабан төшөүен иҫәпкә алып, төп ставканы кәметергә хәл итте. Ҡулланыусылар һорауының ҡыҫҡарыуы һәм февраль-майҙа һумдың нығыныуы күҙәтелгән шарттарҙа ҡулланыусылар хаҡтарының үҫеше кәмеүе дауам итте», — тиелә Рәсәй банкының белдереүендә.

Үҙәк банктың мәғлүмәттәре буйынса, илдә инфляция 15,7 процент кимәлендә ҡала.