10 декабрь, Шәмбе

09 июнь 2015 йыл, 17:02

Башҡортостан делегацияһы Санкт-Петербург һабантуйында ҡатнашасаҡ

фото: Олег Яровиков

ӨФӨ, 2015 йыл, 9 июнь. /«Башинформ» мәғлүмәт агентлығы, Ләйлә Аралбаева/. Шәмбе, 13 июндә, Ленинград өлкәһенең Сярьги ауылында һабантуй уҙғарыла. Унда Санкт-Петербург һәм Ленинград өлкәһе губернаторҙары, Башҡортостандан һәм Татарстандан килгән рәсми делегациялар ҡатнаша.

Һабан байрамына йыйылыусылар өсөн башҡорт һәм татар этнофольклор ауылдары ҡорола. Байрам программаһында төрлө спорт ярыштары һәм милли конкурстар ҡаралған. Билбау көрәше һабантуйҙың иң сағыу ваҡиғаһына әүереләсәк. Милли аш-һыуҙан ауыҙ итергә, йәрминкәләрҙә сувенирҙар һәм биҙәү-ҡулланма сәнғәте әйберҙәрен һатып алырға мөмкин буласаҡ. Кескәйҙәр өсөн конкурстар һәм уйындар ойошторола.

Өс сәхнәлә Санкт-Петербург, Ленинград өлкәһе, Башҡортостан һәм Татарстан коллективтары сығыш яһаясаҡ. Быйыл Санкт-Петербургта уҙғарылған һабантуйға Өфө артистарының йыйылма командаһы һәм Мостай Кәрим исемендәге Милли йәштәр театры актерҙары бара. Йыл һайын ошо байрамға 100 мең самаһы кеше йыйыла. Санкт-Петербургта тәүге ҡала һабантуйы 1913 йылда Йосопов паркында үткәрелгән. 1932 йылдан башлап Бөйөк Ватан һуғышына тиклем даими байрам булараҡ ойошторолған. Тәүҙәрәк ул Выборг Мәҙәниәт һарайы биләмәһендә, һуңынан Шапки ҡасабаһында уҙғарылған.

темалар: һабантуйҙар