4 декабрь, Йәкшәмбе

27 май 2015 йыл, 17:55

Башҡортостанда төрки донъяһын тикшереү халыҡ-ара симпозиумы уҙғарыла

фото: Олег Яровиков

ӨФӨ, 2015 йыл, 27 май. /«Башинформ» мәғлүмәт агентлығы, Эльмира Сабирова/. Башҡортостанда төрки донъяһын тикшереү халыҡ-ара симпозиумы уҙғарыла. Өсөнсө фәнни-мәғариф форумы 2016 йылдың майында М.Аҡмулла исемендәге Башҡорт дәүләт педагогия университетында була.

Быйыл симпозиум делегаттарын Алматы ҡалаһы ҡабул итте. Унда ҡатнашыу өсөн Ҡаҙағстанға Төркиә, Азербайжан, Ҡырғыҙстан, Үзбәкстан, Рәсәй, Италия, АҠШ, Ҡытай, Корея, Нидерландтар, Сербия һәм башҡа илдәрҙән 500-ҙән ашыу ғалим килде. Башҡортостандан ғилми эшмәкәрҙәр, магистранттар, БДПУ-ның фәнни эштәр буйынса проректоры Гөлназ Шафиҡова етәкселегендә башҡорт филологияһы студенттары барҙы.

Күләмле сараның маҡсаты — төркиҙәрҙең мәҙәни һәм рухи ҡиммәттәрен тикшереү, үҫтереү һәм популярлаштырыу.

Беренсе төрки донъяһын тикшереү халыҡ-ара симпозиумы былтыр яҙ Төркиәнең Нийде ҡалаһында ойошторолдо. Проект Төркиәнең Нийде университеты, Ҡаҙағстандың дәүләт ҡатын-ҡыҙҙар педагогия университеты һәм Башҡорт дәүләт педагогия университеты араһындағы килешеү нигеҙендә ғәмәлгә ашырыла, тип аңлатма бирҙеләр БДПУ-ның матбуғат үҙәгендә.