11 декабрь, Йәкшәмбе

08 май 2015 йыл, 12:50

Баш ҡалаға Еңеү парадында ҡатнашыу өсөн Бөйөк Ватан һуғышы ветерандары килде

фото: Башҡортостан Хеҙмәт һәм халыҡты социаль яҡлау министрлығының матбуғат хеҙмәте

ӨФӨ, 2015 йыл, 8 май. /«Башинформ» мәғлүмәт агентлығы, Гөлфиә Акулова/. Өфөгә Еңеүҙең 70 йыллығына арналған байрам сараларында ҡатнашыу өсөн бөтә республиканан 300 Бөйөк Ватан һуғышы ветераны килде. Тантанала ҡатнашыусыларҙы «Йәшел сауҡалыҡ» шифаханаһына урынлаштырҙылар.

Бөгөн, 8 майҙа, Хәрби Дан музейында Башҡортостан Башлығы Рөстәм Хәмитов ветерандарға юбилей миҙалдары тапшырҙы. Башҡортостан Хеҙмәт һәм халыҡты социаль яҡлау министрлығының матбуғат хеҙмәте хәбәр итеүенсә, көндөң икенсе яртыһында «Башҡортостан» концерт залында ветерандар өсөн байрам концерты һәм төбәк Башлығы исеменән тантаналы ҡабул итеү ойошторола.

9 майҙа Өфө хакимиәте бинаһы алдында үтәсәк Еңеү парадында ветерандарҙы республика Хеҙмәт һәм социаль яҡлау министрлығы һәм ведомство ҡарамағындағы учреждение белгестәре, ирекмәндәр, медицина хеҙмәткәрҙәре оҙатып йөрөйәсәк.