6 декабрь, Шишәмбе

07 май 2015 йыл, 18:29

Башҡортостанда Бөйөк Ватан һуғышы ветерандарының тол ҡатындарына торлаҡ сертификаттары тапшырылды

фото: Олег Яровиков

ӨФӨ, 2015 йыл, 7 май. /«Башинформ» мәғлүмәт агентлығы, Арина Рәхимҡолова/. Өфөлә Рәсәй Президентының Башҡортостандағы ҡабул итеү бүлмәһендә Бөйөк Ватан һуғышы ветерандарының тол ҡатындарына торлаҡ сертификаттары тапшырылды. Документтарға алты кеше эйә булды.

Рәсәй Президентының «Бөйөк Ватан һуғышы ветерандарын һәм ветерандарҙың тол ҡатындарын торлаҡ менән тәьмин итеү тураһында» Указы ғәмәлгә ашырыла башлағандан алып Башҡортостанда 870 кеше таныҡлыҡ алған. Ошо маҡсатта 1,5 миллиард һумдан ашыу аҡса бүленгән. Сертификат буйынса түләү күләме — 1,2 миллион һум. Республикала торлаҡ шарттарын яҡшыртыуға мохтаж тағы 494 кеше иҫәпләнә. Уларға социаль ярҙам күрһәтеү өсөн 600 миллион һумдан ашыуыраҡ аҡса талап ителә.

Күптән көткән сертификаттарын алған тол ҡатындар республика етәкселегенә һәм Рәсәй Президентына рәхмәт һүҙҙәрен еткерҙе.

«Илдә тыныслыҡ булһын, киләсәк быуын ҡайғы күрмәһен, тип теләйем. Һуғыш бөткәндә миңә 14 йәш ине, әммә бала саҡта ниҙәр генә күрмәнем», — тип һөйләне Фәһимә Зарипова.

Тантана күмәкләп сәй эсеү менән тамамланды.