8 декабрь, Кесе йома

28 апрель 2015 йыл, 9:31

Рәсәй-1 каналында башҡорт телендә яңылыҡтар күрһәтелә башлай

 

ӨФӨ, 2015 йыл, 28 апрель. /«Башинформ» мәғлүмәт агентлығы, Артур Басиров/. 27 апрелдән Рәсәй-1 каналы яңылыҡтарҙы башҡорт телендә лә күрһәтә башлай. «Башҡортостан» ДТРК-ның милли тапшырыуҙар бүлеге етәксеһе Вилдан Ғәлин һүҙҙәренсә, көн һайын шундай ике программа эфирға сығасаҡ.

— Башҡорт телендәге яңылыҡтарҙы иртәнге сәғәт 10-сы 5 минутта һәм көндөҙгө 3-сө яртыла ҡарарға мөмкин, — тип һөйләне Вилдан Ғәлин.

Каналда башҡорт телендә яңылыҡтар «Башҡортостан» ДТРК-ның генераль директоры Азамат Сәлиховтың башланғысы буйынса барлыҡҡа килде. Ошо мәсьәлә үткән аҙнала компанияға республика Башлығы Рөстәм Хәмитов менән Бөтә Рәсәй дәүләт телерадиокомпанияһының генераль директоры Олег Добродеев килгән саҡта күтәрелгәйне.