6 декабрь, Шишәмбе

22 апрель 2015 йыл, 15:35

Башҡортостандың йылға-күлдәрендә аҡҡоштар күренә башланы

фото: Олег Яровиков

ӨФӨ, 2015 йыл, 22 апрель. /«Башинформ» мәғлүмәт агентлығы, Әлим Фәйезов/. Башҡортостандың йылға-күлдәрендә аҡҡоштар күренә башланы. Атап әйткәндә, Туймазы районындағы һыу ятҡылығына аҡҡоштар ҡайтҡан. Ундағы боҙ тулыһынса иреп бөтмәһә лә, пар аҡҡоштар күлгә төшкән. Йыл һайын эргә-тирәләге йорттарҙа йәшәүселәр матур ҡоштарға ҡарап һоҡлана. Былтыр яҙ бында күпмелер ваҡыт биш аҡҡош йәшәгән.

«Ҡандракүл» тәбиғәт паркы экологы Ирина Сабирова һүҙҙәренсә, Ҡандракүл — аҡҡоштарҙың яратҡан урыны. Осош ваҡытында унда 320-гә яҡын ҡош иҫәпләнә, әммә барыһы ла ояламай. 2012 йылда ете пар оя ҡорған. Ҡағиҙә булараҡ, ҡоштар апрель баштарында ҡайта һәм декабргә тиклем ҡала, тип хәбәр иттеләр муниципалитет хакимиәтенән.