9 декабрь, Йома

22 апрель 2015 йыл, 12:35

Тәүлек эсендә Йомағужа һыу һаҡлағысындағы һыу кимәле ике метрға күтәрелгән

фото: Андрей Старостин

ӨФӨ, 2015 йыл, 22 апрель. /«Башинформ» мәғлүмәт агентлығы, Розалиә Вәлиева/. Башҡортостандағы яҙғы ташҡын буйынса мәғлүмәттәргә ярашлы, 2015 йылдың 22 апреленә тәүлек эсендә Йомағужа һыу һаҡлағысындағы һыу кимәле 214 сантиметрға, Павловка һыу һаҡлағысында — 67, Нөгөштә 151 сантиметрға артҡан. Тораҡ пункттарҙы һыу баҫмаған.

«Башинформ» агентлығына Йомағужа һыу һаҡлағысы хакимиәтенән хәбәр итеүҙәренсә, тәүлек эсендә һиҙелерлек күтәрелгән һыу кимәле нормаға тап килә һәм тирә-яҡтағы ауылдарҙа йәшәүселәргә хәүефләнергә сәбәп юҡ.

«Өфө» гидрологик посы эргәһендә Ағиҙел йылғаһының кимәле тәүлек эсендә 31 сантиметрға артҡан, әлеге ваҡытта һыу кимәле 307 сантиметр тәшкил итә. Дим йылғаһы бер төн эсендә ете сантиметрға күтәрелгән. Хәҙерге мәлдә һыу кимәле — 266 сантиметр. Шаҡша биҫтәһендә Ҡариҙел йылғаһы 25 сантиметрға артҡан, һыу кимәле 351 сантиметр тәшкил итә. Өфөлә һыу кимәле 620-720 сантиметрға етәсәк тип күҙаллана.

темалар: ташҡын