8 декабрь, Кесе йома

03 апрель 2015 йыл, 19:22

Рөстәм Хәмитов Яҡутов паркында тәртип урынлаштырыуҙы талап итте

 

ӨФӨ, 2015 йыл, 3 апрель. /«Башинформ» мәғлүмәт агентлығы, Илья Спиридонов/. Рөстәм Хәмитов Бөйөк Ватан һуғышында Еңеүҙең 70 йыллығына әҙерләнеү һәм уны байрам итеү буйынса республика ойоштороу комитетының ултырышы барышында ҡыҫҡа ваҡытта Өфөләге мәҙәниәт һәм ял парктарын тәртипкә килтереүҙе талап итте. И.Яҡутов исемендәге паркта килеп тыуған хәл республика Башлығында айырыуса ризаһыҙлыҡ тыуҙырҙы.

— Был парк 49 йылға шәхси ойошмаға ҡуртымға бирелгән. Балалар паркының ҡуртымға бирелеүе ғәжәпләндерә. Унда бер нәмә лә юҡ. Кешеләр балалар менән йөрөү ауыр, юлдар емерек, ресторандар эшләй тип зарлана. Балалар өсөн паркта шундай эшмәкәрлек алып барырға нисек рөхсәт ителгән? Ике-өс йыл элек уларҙың етәкселеге менән етди һөйләшеү булғайны. Ошо осор эсендә бер ни ҙә эшләнмәгән йәки бик аҙ эшләнгән. Мин был паркта тәртип урынлаштырыуҙы талап итәм, — тине төбәк етәксеһе.