4 декабрь, Йәкшәмбе

25 февраль 2015 йыл, 16:00

Баш ҡалала БРИКС банкы рәйесенең исеме билдәле буласаҡ

 

ӨФӨ, 2015 йыл, 25 февраль. /«Башинформ» мәғлүмәт агентлығы, Артур Басиров/. Өфөлә БРИКС саммитында ошо ойошмаға ингән илдәр үҫеше банкы рәйесе һәм уның урынбаҫары кандидатураһы тураһында ҡарар ҡабул ителәсәк. Был хаҡта «РИА Новости» мәғлүмәт агентлығы хәбәр итә.

Бөгөн, 25 февралдә, Федерация Советы БРИКС илдәре үҫеше банкын булдырыу буйынса килешеүҙе раҫланы. Ошо туралағы килешеүгә 2014 йылдың июнендә Бразилияның Форталеза ҡалаһында ҡул ҡуйылды. Ул БРИКС дәүләттәрендә һәм үҫешеүсе илдәрҙә инфраструктура проекттарын финанслау өсөн булдырыла.

Агентлыҡ хәбәр итеүенсә, Рәсәй Федерацияһының 2015 йылға бюджеты тураһындағы законында банк капиталына индереү өсөн аҡса һалынған да инде. Рәсәй ойошма капиталына ете йыл буйына ике миллиард доллар индерәсәк тип күҙаллана.

Иҫегеҙгә төшөрәбеҙ, БРИКС халыҡ-ара саммиты Өфөлә 8 июлдән 10-на тиклем уҙа.