3 декабрь, Шәмбе

12 февраль 2015 йыл, 9:30

Башҡортостан ауыл хужалығын страховкалау буйынса сығымдарҙы субсидиялауға 195 миллион һум аласаҡ

 

ӨФӨ, 2015 йыл, 12 февраль. /«Башинформ» мәғлүмәт агентлығы, Эльвира Латипова/. Башҡортостан ауыл хужалығы етештереүселәренең страховкалау хеҙмәттәрен түләү буйынса сығымдарын субсидиялау өсөн федераль бюджеттан яҡынса 195 миллион һум аҡса аласаҡ. Дөйөм күләме 6,4 миллиард һумлыҡ субсидиялар Рәсәйҙең 84 субъекты араһында бүленә. Тейешле күрһәтмә Рәсәй Хөкүмәтенең сайтында урынлаштырылған.

Башҡортостанға сәсеүлектәрҙе страховкалау сығымдарының бер өлөшөн ҡаплауға — 145,2 миллион һум, малсылыҡ өлкәһендә страховкалауға 50,2 миллион биреләсәк. Субсидиялар төбәктәр араһында РФ Хөкүмәте ҡарары менән раҫланған ҡағиҙәләргә ярашлы бүленә.

Рәсәйҙең Ауыл хужалығы министрлығы төбәктең субсидияларҙы файҙаланыу һөҙөмтәлелеген страховкаланған сәсеүлектәр өлөшө һәм страховкаланған ауыл хужалығы малдары һаны буйынса баһалай.