3 декабрь, Шәмбе

11 февраль 2015 йыл, 17:08

Башҡортостанда «Өс мөйөшлө һалдат хаттары» акцияһы старт ала

 

ӨФӨ, 2015 йыл, 11 февраль. /«Башинформ» мәғлүмәт агентлығы, Ләйлә Аралбаева/. 15 февралдә Башҡортостанда Бөйөк Ватан һуғышында Еңеүҙең 70 йыллығына арналған «Өс мөйөшлө һалдат хаттары» акцияһы башлана.

Акция республика Хәрби Дан музейы сайтында фронт хаттарының мәғлүмәт ресурсын булдырыу маҡсатында уҙғарыла. Унда ғаилә архивтарында һаҡланған өс мөйөшлө хаттарҙың сканер аша үткәрелгән күсермәләре һәм автор хаҡында белешмә урынлаштырыласаҡ.

Бөйөк Ватан һуғышы осоро хаттарын һаҡлаған кешеләр тарихты һаҡлауға үҙ өлөшөн индерә ала. Акцияла ҡатнашыу өсөн өс мөйөшлө хат авторы тураһында мәғлүмәт битен тултырып,  frontovoe_pismo@mail.ru электрон почтаһына хаттарҙың күсермәләрен ебәрергә кәрәк.

Материалдар 2015 йылдың 22 июненә тиклем ҡабул ителә. Мәғлүмәт битен тултырыу формаһы музейҙың сайтында бирелгән. Белешмә өсөн телефон: (347) 260-44-64, 260-44-16.