7 декабрь, Шаршамбы

23 ғинуар 2015 йыл, 17:35

Фаил Абдраҡов иҫтәлегенә композиторҙар конкурсы Бөйөк Еңеүҙең 70 йыллығына бағышланасаҡ

 

ӨФӨ, 2015 йыл, 23 ғинуар. /«Башинформ» мәғлүмәт агентлығы, Ләйлә Аралбаева/. 6 февралдә Мәләүездә Фаил Абдраҡов иҫтәлегенә һәүәҫкәр композиторҙарҙың республика конкурсы үтә. Быйыл ул Бөйөк Ватан һуғышында Еңеүҙең 70 йыллығына арнала.

Фаил Абдраҡов (1950-2010) — һәүәҫкәр композитор, Башҡортостандың атҡаҙанған мәҙәниәт хеҙмәткәре. Уның йырҙарын республика артистары башҡара, улар халыҡ араһында ла бик популяр.

Конкурста өс йәш категорияһы буйынса һәүәҫкәр композиторҙар ҡатнаша. Ике номинация ла ҡаралған: инструменталь жанр һәм вокал жанры. Бәйгелә ҡатнашыусылар ике әҫәр тәҡдим итергә тейеш. Хәрби-патриотик темаға яҙылған әҫәрҙәргә өҫтәмә балдар ҡаралған.

Жюри составында профессиональ композиторҙар эшләй. Иң яҡшы әҫәрҙәр авторы тип танылған конкурсант Фаил Абдраҡов исемендәге Гран-приға лайыҡ буласаҡ.

Ойоштороусылары — Башҡортостандың Мәҙәниәт министрлығы, Республика халыҡ ижады үҙәгенең Күмертау филиалы, Мәләүез районы хакимиәтенең Мәҙәниәт идаралығы, Мәләүез Ҡала мәҙәниәт һарайы.