9 декабрь, Йома

21 ғинуар 2015 йыл, 17:38

«Мәҙәни йомалар»ҙа башҡорттарҙың хәрби тарихы тураһында фекер алышыу буласаҡ

 

ӨФӨ, 2015 йыл, 21 ғинуар. /«Башинформ» мәғлүмәт агентлығы, Ләйлә Аралбаева/. 23 ғинуарҙа Өфөләге Арт-клубта «Мәҙәни йомалар» проекты сиктәрендә «18-19 быуаттарҙа башҡорттарҙың хәрби тарихы» темаһына лекция үткәрелә. Уны тарих фәндәре кандидаты, «Өфө пехота полкы» хәрби-тарихи клуб етәксеһе Рәмил Рәхимов алып барасаҡ.

«Мәҙәни йомалар» — Арт-клубтың мәғрифәтселек проекты. Бында мәҙәниәт, сәнғәт, тарих, фән темаларына әңгәмәләшеү өсөн ижади кешеләр саҡырыла.

— «Мәҙәни йома» арт-клубында яҡшы кешеләр менән төрлө темаларға аралашырға мөмкин. Көндәлек мәшәҡәттәрҙән арынырға, рәссамдарға, ғалимдарға, дизайнерҙарға һорау бирергә теләһәгеҙ, беҙгә килегеҙ. Маҡсатыбыҙ — Өфө ҡалаһының мәҙәни мөхитен үҙгәртеүҙә ҡатнашыу, — тип аңлатты арт-клуб директоры Айгөл Рәшитова.

Арт-клуб түбәндәге адрес буйынса урынлашҡан:  К.Маркс урамы, 37, 1-се корпус, 310-сы бүлмә. Тулыраҡ мәғлүмәт — сайтта.

Киске сәғәт 7-лә башлана.