5 декабрь, Дүшәмбе

12 ғинуар 2015 йыл, 9:56

Башҡортостанда «Һылыуҡай-2015» матурлыҡ конкурсына әҙерлек башланды

 

ӨФӨ, 2015 йыл, 12 ғинуар. /«Башинформ» мәғлүмәт агентлығы, Гөлфиә Акулова/. Башҡорт ҡыҙҙарының «Һылыуҡай-2015» гүзәллек бәйгеһенә әҙерлек башланды. Төркөмдә республика райондары һылыуҡайҙары өсөн асыҡ тауыш биреү бара.

Конкурста 16 йәштән 22 йәшкә тиклем ҡыҙҙар ҡатнаша. Бәйге талаптарының иң мөһиме — тышҡы матурлыҡ менән бергә башҡорт телен белеү.  

«Һылыуҡай-2015» республика телевизион конкурсының һайлап алыу туры ҡалаларҙа февралдә, Өфөлә март башында үтә. Бәйгенең финалы 10 апрелдә «Башҡортостан» дәүләт концерт залында уҙасаҡ.

Хәтерегеҙгә төшөрәбеҙ, быйыл «Һылыуҡай» 23-сө тапҡыр ойошторола. Ошо йылдар эсендә конкурста 200-ҙән ашыу ҡыҙ ҡатнашты, шуларҙың күбеһе реклама һәм модель бизнесында үҙ карьераһын дауам итте.

Конкурстың ойоштороусылары — «Башҡортостан» ТРК ДУП-һы, БР Мәҙәниәт министрлығы, Республика халыҡ ижады үҙәге һәм «Аҙна»     гәзите.