9 декабрь, Йома

30 декабрь 2014 йыл, 16:52

Рөстәм Хәмитов Рәсәйҙең һәм Башҡортостандың дәүләт наградаларын тапшырҙы

фото: Андрей Старостин

ӨФӨ, 2014 йыл, 30 декабрь. /«Башинформ» мәғлүмәт агентлығы, Әлим Фәйезов/. 30 декабрҙә Өфөлә Башҡортостан Президенты Рөстәм Хәмитов Рәсәй ФедерацияҺы һәм Башҡортостан Республикаһының дәүләт наградаларын тапшырҙы. Республиканың 49 алдынғы сәнәғәт, һаулыҡ һаҡлау, транспорт, социаль өлкә, торлаҡ-коммуналь хужалығы, мәҙәниәт һәм сәнғәт хеҙмәткәрҙәре маҡтаулы исемдәр, почет грамоталары менән бүләкләнде.

Яҡынлашып килгән Яңы йыл менән ҡотлап, республика башлығы уларҙың һәммәһе лә үҙҙәренең хеҙмәте менән ошо наградаларға лайыҡ булды тип билдәләне.

— Заманалар еңел түгел. Бөгөнгө көндә берҙәмлек, илебеҙ мәнфәғәте өсөн бергә эшләргә кәрәк. Барыһы ла быны аңлап етмәй, әммә кем аңлай, шулар намыҫлы хеҙмәт итә. Һис шикһеҙ, һеҙ шулар иҫәбендә. Һеҙ төрлө тармаҡтарҙа эшләйһегеҙ, башҡаларға өлгө булып тораһығыҙ, — тине Рөстәм Хәмитов.

Бүләкләнеүселәрҙең исемлеге менән БР Президентының рәсми сайтында танышырға мөмкин.