4 декабрь, Йәкшәмбе

27 ноябрь 2014 йыл, 14:51

«Башҡортостан Республикаһы Башлығы тураһында»ғы закон проекты беренсе уҡыуҙа ҡабул ителде

 

ӨФӨ, 2014 йыл, 27 ноябрь. /«Башинформ» мәғлүмәт агентлығы, Ғәлиә Нәбиева/. БР Дәүләт Йыйылышы – Ҡоролтай депутаттары пленар ултырышта «Башҡортостан Республикаһы Башлығы тураһында»ғы закон проектын ҡараны. Новелла Дәүләт төҙөлөшө, хоҡуҡ тәртибе һәм суд мәсьәләләре буйынса комитет тарафынан әҙерләнгән.

Закон проекты республиканың иң юғары вазифалы кешеһенең исемен үҙгәртеү менән бәйле һәм Башҡортостан Республикаһы Башлығы эшмәкәрлегенең хоҡуҡи нигеҙҙәрен һәм хоҡуҡ гарантияларын билдәләй: һайлау тәртибе, ҡабул ителәсәк анттың тексы, дәүләт менән идара итеү өлкәһендәге ҡануни вәкәләттәр, уларҙы ваҡытынан алда туҡтатыу тәртибе, биреләсәк айырым хоҡуҡтар, отставкаға киткәндән һуңғы статус.

Комитет рәйесе Виктор Пчелинцев аңлатыуынса, 2014 йылдың 4 мартындағы федераль ҡануниәткә ярашлы Башҡортостан Конституцияһына республиканың юғары вазифалы кешеһенең вазифаһын икенселәй исемләү тураһындағы төҙәтмәләр индерелде. Күсмә осор үткәндән һуң, йәғни 2015 йылдың 1 ғинуарынан үҙгәрештәрҙең ҡануни рәүештә үҙ көсөнә инеүе беркетелгән. Дәүләт төҙөлөшө буйынса комитет РФ һәм БР Конституцияларына ярашлы республика Башлығы эшмәкәрлегенең дөйөм хоҡуҡи нигеҙҙәрен һәм гарантияларын билдәләүсе закон проектын әҙерләгән.

Депутаттар проектты беренсе уҡыуҙа ҡабул итте.