7 декабрь, Шаршамбы

22 октябрь 2014 йыл, 10:30

Күмертауҙың интернет порталы – бөтә Рәсәй конкурсы лауреаты

 

ӨФӨ, 2014 йыл, 22 октябрь. /«Башинформ» мәғлүмәт агентлығы, Арина Рәхимҡолова/. Күмертау хакимиәтенең рәсми сайты, Һамар өлкәһенең Похвистнево порталынан ҡалышып, «Иң яҡшы муниципаль сайт» бөтә Рәсәй конкурсында лауреат булды.

Урындағы үҙидаралыҡ тураһында сайттарҙың йыл һайынғы бөтә Рәсәй конкурсы муниципаль берәмектәр һәм башҡа урындағы үҙидаралыҡ ойошмалары эшендә интернет-технологияларҙы популярлаштырыу маҡсатында уҙғарыла. Еңеүселәр биш номинацияла билдәләнә: «Федерация субъекты үҙәгенең иң яҡшы сайты», «Иң яҡшы муниципаль район сайты», «Иң яҡшы ҡала округы сайты», «Иң яҡшы ҡала биләмәһе сайты» һәм «Иң яҡшы ауыл биләмәһе сайты».

Республика муниципалитеттарының интернет-порталдары йыл һайын уҙғарылып килгән бәйгелә призлы урындарҙы беренсе ҡат ҡына яулап ҡалмай. Былтыр Ауырғазы районы хакимиәте сайты еңеүсе булғайны.

Конкурсты ойоштороусылар – Муниципаль академия, Федерация Советы һәм Дәүләт Думаһының урындағы үҙидаралыҡ мәсьәләләре буйынса комитеттары, «Управа» журналы.

Конкурс еңеүселәрен һәм лауреаттарын ноябрҙә Мәскәүҙә Рәсәй муниципаль академияһының ғилми-ғәмәли конференцияһы сиктәрендә бүләкләйәсәктәр.