6 декабрь, Шишәмбе

22 май 2014 йыл, 16:57

2015 йылда Башҡортостанда ике ҡояш электр станцияһы барлыҡҡа киләсәк

автор: Розалия Вәлиева

2015 йылда Башҡортостанда дөйөм ҡеүәте 15 МВТ тәшкил иткән ике ҡояш электр станцияһы барлыҡҡа киләсәк. Хәйбулла районының Бүребай ауылында ҡеүәте 10 МВт булған Баймаҡ электр станцияһы, Көйөргәҙе районында – ҡеүәте 5 МВТ булған Бөгөлсән электр станцияһы төҙөләсәк. Башҡортостан территорияһында ҡеүәте 5-25 МВт булған ҡояш электр станциялары төҙөү буйынса республика Хөкүмәте, «Авелар Солар Технолоджи» яуаплылығы сикләнгән йәмғиәте һәм «Хевел» яуаплылығы сикләнгән йәмғиәте араһында хеҙмәттәшлек тураһында килешеү 23 майҙа Петербургта халыҡ-ара иҡтисади форумда төҙөлгән. Был хаҡта «Башинформ» агентлығына «Авелар Солар Технолоджи» яуаплылығы сикләнгән йәмғиәтендә хәбәр иттеләр.

2016 йылда дөйөм ҡеүәте 24 МВт тәшкил иткән (Иҫәнғол — 9 МВт, Бөгөлсән (икенсе сират) — 5 МВт һәм Бүребай— 10 МВт) өс ҡояш электр станцияһын Ейәнсура, Көйөргәҙе һәм Хәйбулла райондарында сафҡа индереү планлаштырыла.

Шулай итеп, 2015-2016 йылдарҙа республика территорияһында дөйөм ҡеүәте 39 МВт булған биш ҡояш электр станцияһы төҙөү планлаштырыла – ҡеүәтте күмәртә баҙарына поставкалау күҙҙалана.

Һанап үтелгән проекттарға өҫтәп киләсәктә 2015-2020 йылдарҙа өс көньяҡ районда дөйөм ҡеүәте 50-90 МВт тәшкил иткән электр станциялары сафҡа индереү мөмкинлеге ҡарала.

«Авелар Солар Технолоджи» яуаплылығы сикләнгән йәмғиәте Виктор Вексельбергтың «Ренова» төркөмөнә инә. Былтыр компания  Йылайыр, Хәйбулла, Баймаҡ, Көйөргәҙе һәм Ейәнсура райондарында ҡояш электр станциялары төҙөү өсөн республикала ете яуаплылығы сикләнгән йәмғиәте теркәгән, тип хәбәр итә «Коммерсант».