9 декабрь, Йома

28 март 2014 йыл, 17:00

«Яҙ Гүзәле» конкурсы еңеүсеһе Татарстанға юллана

автор: Гөлфиә Акулова

Стәрлетамаҡта уҡыусылар араһында һылыуҡайҙарҙы һайланылар. «Яҙ Гүзәле-2014» матурлыҡ байрамын Балалар һәм үҫмерлек ижады үҫеше үҙәге менән ҡаланың йәштәр сәйәсәте буйынса бүлеге ойошторҙо.

Стәрлетамаҡтың төрлө белем биреү учреждениеларынан 11 ҡыҙ үҙҙәренең ижади таланттарын, йырлау һәм бейеү һәләттәрен, актерлыҡ оҫталыҡтарын һәм тыуған телде белеүҙәрен күрһәтте.

Еңеүсе тажын һәм «Яҙ Гүзәле» почет таҫмаһын татар һылыуҙары араһында Башҡорт сәнғәт колледжы уҡыусыһы Альбина Вәлиева яуланы, башҡорт телле гүзәлдәр араһында иң яҡшыһы ҡаланың икенсе гимназия уҡыусыһы Лилиана Кәримова булып сыҡты. Иҫтәлекле бүләктәр һәм дипломдарҙан тыш, һылыуҙар Ҡазанға экскурсия турына барыу мөмкинлегенә эйә булды, тип хәбәр итә ҡаланың Балалар һәм үҫмерлек ижады үҫеше үҙәге.