4 декабрь, Йәкшәмбе

24 март 2014 йыл, 17:42

Башҡортостан делегацияһы Мәскәүҙә Мәҙәниәт йылын тантаналы асыуҙа ҡатнашасаҡ

автор: Гөлфиә Акулова

Мәҙәниәт хеҙмәткәрҙәре көнөндә, 24 мартта, бөтә Рәсәйҙән сәнғәт эшмәкәрҙәре Мәскәүҙә Мәҙәниәт йылын рәсми асыуға йыйыласаҡ. Тантанаға һәр субъекттан 10 кеше иҫәбендә делегат саҡырылған. БР Мәҙәниәт министрлығының матбуғат секретары Ләйлә Ишморатова хәбәр итеүенсә, байрамда шулай уҡ Башҡортостан делегацияһы ла ҡатнашасаҡ. Делегация составында – БР билдәле мәҙәниәт һәм сәнғәт эшмәкәрҙәре: Рәсәйҙең атҡаҙанған артисы Азат Айытҡолов, РФ һәм БР халыҡ артисы Таңсулпан Бабичева, БР һәм РФ атҡаҙанған сәнғәт эшмәкәре Нур Дауытов, фоторәссам Рәмил Килмәмәтов,  Рәсәйҙең һәм Башҡортостандың халыҡ артисы Леонора Ҡыуатова, БР халыҡ артисы Александр Федеряев, кинорежиссер Булат Йосопов, Нефтекама ҡала китапханаһы директоры Франц Ян.

Төбәктәрҙән вәкилдәр өсөн Рәсәйҙең баш ҡалаһы буйлап экскурсия ойоштороласаҡ, ә Мәҙәниәт йылын асыу тантанаһы Ҙур театрҙа үтәсәк. Шулай уҡ сара сиктәрендә Мәҙәниәт хеҙмәткәрҙәренең Бөтә Рәсәй форумы, тармаҡ конференциялары һәм Мәҙәниәт буйынса координация советы ултырышы уҙасаҡ.