9 декабрь, Йома

24 ғинуар 2014 йыл, 15:30

«Башҡортостан» гәзите талантлыларҙы эҙләүен дауам итә

автор: Алик Шакиров

Ошо көндәрҙә, республикабыҙҙа рәсми рәүештә Мәҙәниәт йылына старт биргән көндө, «Башҡортостан» гәзите «Талантлыны данлай «Башҡортостан» конкурсының башланыуы тураһында иғлан итте. Конкурстың маҡсаты – төбәгебеҙҙә һәм уның сигендә һирәк башҡарыу оҫталығына эйә булыусы йырсыларҙы, бейеүселәрҙе, музыканттарҙы, һәүәҫкәр композиторҙарҙы эҙләү. Һәм, әлбиттә, гәзит аша уларҙың таланттары тураһында киң тамашаға һөйләү.

«Башҡортостан» гәзитенең баш мөхәррире урынбаҫары Рәшит Кәлимуллин хәбәр итеүенсә, быға оҡшаш конкурстар гәзиттә яҡшы йолаға әүерелде. Атап әйткәндә, 2012 йылда баҫма журналистары ауылдарҙа йәш эшҡыуарҙарҙы эҙләне һәм улар тураһында материалдар  («Йүнселлекте данлай «Башҡортостан» конкурсы) әҙерләне, ә йыл аҙағында Башҡорт дәүләт филармонияһында еңеүселәргә бүләктәр тапшырҙы. Үткән йылда журналистар төпкөл ауылдарҙа, эшһеҙлеккә зарланмай үҙҙәренең алтын ҡулдары менән үҙ ғаиләләрен туйҙыра алған халыҡ оҫталары тураһында яҙҙы («Һөнәрлене данлай «Башҡортостан» конкурсы). Декабрҙә М.Ғафури исемендәге Башҡорт драма театрында был конкурстың һуңғы этабы менән дипломдар һәм ҡиммәтле бүләктәр тапшырыу тантанаһы үтте.

Был конкурсҡа йомғаҡтар яһау декабрҙең тәүге көндәрендә планлаштырыла. Конкурс номинацияларында халыҡ һөйөүенә бүләк ҡаралған. Уның хужаһы гәзит сайтында «лайктар» иҫәбе буйынса билдәләнәсәк.