6 декабрь, Шишәмбе

12 декабрь 2013 йыл, 9:57

Өфөлә оборона комплексы предприятиеларының эш перспективаларын тикшерҙеләр

автор: Әлим Фәйезов

Өфөлә «Гидравлика» Өфө агрегат предприятиеһы» асыҡ акционерҙар йәмғиәте базаһында Башҡортостан Республикаһы Сәнәғәт һәм инновация сәйәсәте министрлығы «Авиация ҡорамалдары» асыҡ акционерҙар йәмғиәте («Ростех» дәүләт корпорацияһы) менән бергә Башҡортостан Республикаһы территорияһында урынлашҡан оборона-сәнәғәт комплексы предприятиеларының техник директорҙары кәңәшмәһен ойошторҙо.

БР Сәнәғәт министрлығы матбуғат хеҙмәтенән хәбәр итеүҙәренсә, ведомство тарафынан техник белгестәрҙең бындай кәңәшмәһе өсөнсө тапҡырына үткәрелә инде, әммә был юлы предприятиелар даирәһе оборона-сәнәғәт комплексы производстволары менән генә сикләнде. Был инициативаны «Авиация ҡорамалдары» асыҡ акционерҙар йәмғиәте вәкилдәре тәҡдим итте, бында ике төп маҡсат күҙ уңында тотолдо: төрлө вертикаль-интеграция структураларына ингән предприятиелар араһында кооперация бәйләнештәрен юлға һалыу һәм предприятиеларҙың техник белгестәре араһында аралашыу дефицитын бөтөрөү.

Кәңәшмәлә республика предприятиеларының һәм «Авиация ҡорамалдары» холдингының техник подразделениелары етәкселәре, республика Президенты Хакимиәте һәм БР Сауҙа-сәнәғәт палатаһы вәкилдәре ҡатнашты.

Ултырышта Башҡортостан Республикаһы территорияһында урынлашҡан оборона-сәнәғәт комплексы предприятиеларының эш йомғаҡтары, шулай уҡ етештереү һөҙөмтәлелеген күтәреү маҡсатында бизнес-процестар ойоштороу кәрәклеге тикшерелде. Йыйылыусылар Башҡортостан Республикаһының оборона-сәнәғәт комплексы предприятиеларында проекттар менән идара итеү системаларының һөҙөмтәлелеге, ҡорамалдар әҙерләгәндә 3D-технологияларҙы ҡулланыу перспективалары тураһында һөйләште.

Кәңәшмә һөҙөмтәләре буйынса бындай сараларҙы ярты йылға бер тапҡыр үткәрергә ҡарар ителде.