3 декабрь, Шәмбе

10 декабрь 2013 йыл, 16:10

Баш ҡалала бик күп боҙ ҡаласаҡтары барлыҡҡа киләсәк

автор: Арина Рәхимҡолова

Өфөлә быйыл ҡыш 22 боҙ ҡаласығы барлыҡҡа киләсәк һәм 50-нән ашыу шыршы ҡуйыласаҡ. Был турала оператив кәңәшмәлә ҡала хакимиәте башлығы Ирек Ялалов һөйләне. Яңы йылды байрамы көндәрендә Башҡортостандың баш ҡалаһында әлегә тиклем был тиклем майҙансыҡтар булмағайны.

— Беҙ быны махсус рәүештә бөтә биҫтәләр халҡы ҡаланың бер осонан икенсе осона йөрөмәйенсә байрам итә алһын өсөн эшләйбеҙ, — тине Ирек Ялалов.

Шулай уҡ Яңы йыл каникулдарында ял иткәндә ҡала халҡының именлеген тәьмин итеү төп мәсьәлә булып тора, тип билдәләне сити-менеджер.

Иҫегеҙгә төшөрәбеҙ, Ленин исемендәге майҙанда ҡаланың төп шыршыһын асыу тантанаһы 25-26 декабргә планлаштырылған. Боҙ ҡаласығы бында һәр ваҡыттағыса йондоҙнәмә билдәләренә бәйле биҙәләсәк. Байрам ҡаласығының скульптуралары, элементтары һәм композицияларының төп канвойы ат һәм «2014» һаны буласаҡ. Шулай уҡ ҡала халҡы ике ҙур боҙ тауынан шыуып рәхәтләнәсәк, «Вьюговей-2014» фестивален уҙғарыу өсөн урын бүленә, мәктәпкәсә тиклем йәштәге балалар өсөн майҙансыҡтар һәм туҡланыу пунктары булдырыла. Майҙанды биҙәгәндә яңы технологиялар һәм скульптураларҙы яҡтыртҡыс менән заманса композициялар ҡулланыласаҡ, Ленин һәйкәле артында һырғалаҡ буласаҡ. Бөгөнгө көнгә майҙанда 27 метр бейеклегендәге Яңы йыл шыршыһы ҡуйылған.