9 декабрь, Йома

09 декабрь 2013 йыл, 17:59

Өфөлә йәш ғалимдарҙың иң яҡшы ғилми проектын һайлаясаҡтар

автор: Эльмира Сабирова

«УМНИК» фәнни-техник өлкәһендә бәләкәй предприятиелар үҫешенә булышлыҡ итеү фонды программаһы буйынса инновацион проекттар конкурсының  йомғаҡлау сессияһы БР Фәндәр академияһында 9-10 декабрҙә үткәрелә.

БР Фәнгә ярҙам итеү һәм уны үҫтереү фондының матбуғат хеҙмәтенән хәбәр итеүҙәренсә, финалда республика вуздарында һайлап алыу турын үткән, бер нисә тиҫтә иң яҡшы инновацион проекттар авторҙары ҡатнашасаҡ. Уларҙың ғилми эштәрен эксперт комиссияһы тикшерәсәк, уның составында вуздарҙың һәм ғилми-тикшеренеү ойошмаларының әйҙәүсе белгестәре, шулай уҡ БР Фәндәр академияһы ғалимдары. Финалсылар биш йүнәлеш буйынса үҙ проекттарын тәҡдим итәсәк: «Мәғлүмәти технологиялар», «Заманса материалдар һәм уларҙы булдырыу технологиялары», «Биотехнологиялар», «Яңы приборҙар һәм аппарат комплекстары» һәм «Киләсәк медицинаһы». Программала ҡатнашыу өсөн төп критерийҙар – фәнни яңылыҡ, актуаллек, продукттың (технологияның) техник әһәмиәте, шулай уҡ проектты бойомға ашырыу мөмкинлеге.

Конкурсҡа 10 декабрҙә йомғаҡ яһаласаҡ.

Программаны финанслауға Фонд йыл һайын 500 миллион һум аҡса бүлә. Конкурс еңеүсеһе ике йылға 400 мең һум күләмендә грант аласаҡ. Шулай, конкурстың яҙғы сессияһы барышында Башҡортостандан 15 кеше субсидия алды.

темалар: фән,конкурстар