10 декабрь, Шәмбе

03 декабрь 2013 йыл, 14:06

Туҡталыштарҙа “почта тәҙрәләре” асырға планлаштырыла

автор: Розалия Вәлиева

Йәмәғәт транспорты туҡталыштарында торлаҡ-коммуналь хеҙмәттәргә түләүҙәр ҡабул итеү өсөн «почта тәҙрәләре» асыу  планлаштырыла, тип хәбәр итте «Башинформ» агентлығына Рәсәй Почтаһы филиалының Федераль почта хеҙмәте идаралығы матбуғат секретары Борис Слуцкий.

Түләү пункттары асыуҙы Затон күперенә ингән саҡта «Йәшел тау» туҡталышында асылған беренсе почта тәҙрәһе эшмәкәрлегенә анализ яһағандан һуң хәл итәсәктәр.

— Беҙ был пункттың рентабеллелегенә анализ яһаясаҡбыҙ, — тип аңлатты Борис Слуцкий. — Әлбиттә, бындай почта бүлексәләре булдырыуҙың маҡсаты — аҡса эшләү түгел, ә сираттарҙы кәметеү. Әгәр уларҙың эшмәкәрлеге зыян килтермәһә, бындай тәҙрәләр ҡалала ла асыласаҡ.  Беренсе сиратта, Сипайлово биҫтәһендә, унда 120 мең кешегә ни бары дүрт почта бүлексәһе тура килә.