9 декабрь, Йома

02 декабрь 2013 йыл, 16:28

Башҡорт дәүләт аграр университеты бөтә Рәсәй конкурсы призеры

автор: Евгения Сюткина, Азат Шәрәфетдинов

Башҡорт дәүләт аграр университеты Барнаулда үткән Рәсәй Ауыл хужалығы министрлығы вуздарының VII Бөтә Рәсәй махсус студент отрядтары слетында ҡатнашты. Алтайға 40 төбәктән делегациялар йыйылды.

Слет беренсе тапҡыр Урал аръяғында үткәрелә, элек уны Рязань, Волгоград, Кострома, Мәскәү һәм Өфө ҡабул итте.

Башҡорт аграр университеты исеменән хеҙмәт отрядтары штабы етәксеһе, «Башаҡ» махсус студенттар отряды командиры Азат Шәрәфетдинов, «Башаҡ»тың комиссары, механика факультетының III курс студенты Динар Хафизов һәм Рәсәй Ауыл хужалығы министрлығы вуздарының махсус студент отрядтары ветерандар советы рәйесе Рим Әбләйев ҡатнашты.

Слет һөҙөмтәләре буйынса студент отрядтары эшмәкәрлеген иң яҡшы ойоштороусы аграр вуздар исемдәрен иғлан иттеләр. Был конкурста Рәсәйҙең бөтә 59 аграр юғары уҡыу йорто ҡатнашты. Башҡорт дәүләт аграр университетының «Башаҡ» махсус студенттар отряды конкурс һөҙөмтәләре буйынса «Студенттар отрядтары эшмәкәрлеген иң яҡшы ойоштороусы уҡыу йорто» номинацияһында икенсе урын яуланы.